Ruth logra un contrato indefinido na multinacional Leroy Merlin

• O seu posto de traballo consiste na reposición e mais etiquetado de productos nas instalacións que a multinacional ten no Concello de Mos

A finais de decembro, Ruth recibiu unha noticia que a deixou, como ela misma di, “sorprendida e moi contenta”: fora seleccionada pola empresa Leroy Merlín para traballar nas súas instalacións en Mos.

Ter firmado un contrato indefinido supón unha motivación á hora de enfrentarse a este novo reto laboral. As súas funcións na sección de sanitarios, como ela misma define, consisten en “axudar a colocar a mercancía que fai falta. Co móvil escaneo o código de barras do producto para por a etiqueta. E tamén limpo e ‘frenteo’ a mercancía”.

Traslada que se sinte moi a gusto no seu novo traballo e que lle agradan, en xeral, todas as súas tarefas. Pon en valor, sobre todo, a relación cos seus compañeiros e o feito de gañar o seu propio diñeiro: “teño bos compañeiros/as,  que me axudan e eu tamén lles podo axudar a eles. Faime sentir moi ben, a verdade”. Sobre a súa economía, explica que “para min gañar o meu propio diñeiro significa moito”. Fundamental.

Ruth é unha das persoas máis veteranas dentro do Servizo de Emprego con Apoio de Down Vigo. No seu extenso currículo destacan postos de reponedora, axudante de farmacia, auxiliar de gasolineira, prácticas en hostalería etc. Ao longo dos anos, adquiriu a experiencia laboral suficiente para conseguir un posto de traballo estable no que sente enormemente feliz.

O programa Emprego con Apoio está deseñado para atender especificamente ás necesidades e barreiras que as persoas con síndrome de Down e outras diversidades intelectuais atopan á hora de tentar acceder ao mercado laboral ordinario. Este modelo baséase en un sistema estruturado de apoios e acompañamentos para guiar ás persoas demandantes de emprego a través de todo o proceso de inserción sociolaboral e asegurar a súa correcta incorporación ao posto de traballo.

Agradecemos a Leroy Merlin a oportunidade de visibilizar a Síndrome de Down no mercado laboral ordinario e esperamos que esta experiencia sirva como exemplo para que cada vez sexa máis común e duradeira a contratación de persoas con algunha diversidade,

Parabéns e ánimo na túa nova etapa, Ruth!