A obra ‘A Sirena’, de Down Vigo, chea de maxia o Evento Internacional de Disciplinas de Baile Vigo Porté
- A 12ª edición de Vigo Porté, evento internacional de referencia de disciplinas de baile, celebrouse en Vigo esta fin de semana coa actuación dun grupo de Down Vigo
- Adrián, Tamara, María e Luana actuaron, acompañados por profesionais da entidade cunha exhibición previa á Gran Final
Este domingo, Down Vigo puxo en pé ao auditorio Mar de Vigo coa súa obra ‘A Sirena’. Adrián Dacuña, Luana Otero, María Centeo e Tamara Carballa actuaron na gran final de Vigo Porté, xunto ás profesionais da entidade Estefanía Hermida, Leticia Torres, Miriam Armada e Patricia Sobreira. Baixo a dirección de Erick Alexander Corrente, técnico de Musicoterapia, desenvolveron unha obra dancística cuxa temática era o amor non correspondido.
Vigo Porté 2024
Vigo Porté é un evento Internacional de Disciplinas de Baile que este ano celebrou a súa duodécima edición presencial no Auditorio Mar de Vigo. De media, estímase que máis de 8.000 persoas asistiron como público durante toda a fin de semana. Nesta edición, a escola de danza viguesa Media Punta converteuse na gañadora do Premio Vigo Porté 2024, coa súa coreografía Rede Jazz.
O carácter do evento é internacional, con presenza de participantes de toda España, Portugal, Francia, Chile e Venezuela. É considerado un dos eventos de danza máis importantes de Europa, tanto por parte de membros do xurado, como polos propios participantes que adoitan asistir a eventos noutros países e cualifican como superior, a calidade e organización de Vigo Porté.
Javier Castillo “Poty” foi, un ano máis, o “buque insignia” do evento. Nesta edición, foi o encargado de escoller, xunto co resto dos seus compañeiros do xurado, as mellores coreografías das catro categorías do Trofeo.
Agradecemos de xeito especial a Vigo Porté o seu compromiso con visibilizar a inclusión real e a oportunidade de demostrar que as disciplinas artísticas poden ser unha saída profesional para as persoas con Síndrome de Down e diversidade intelectual.
