Sofía comeza a traballar en Sanitas Dental
- Grazas á colaboración de Down España con Sanitas Dental, Sofía acaba de asinar o seu primeiro contrato de traballo, indefinido desde o primeiro día
- Como ela mesma explica: “estou moi feliz. Teño compañeiras, relaciónome, participo”
Sofía acaba de asinar o seu primeiro contrato de traballo, indefinido desde o primeiro día, grazas a unha oportunidade laboral en Sanitas Dental xurdida por mor da colaboración con Down España.
Desde hai unhas semanas, traballa como persoal de apoio nunha das clínicas dentais que a empresa ten en Vigo. As súas tarefas consisten en repoñer material nas consultas e preparar bolsas de esterilización. Entre elas, Sofía destaca que lle gusta especialmente revisar a caducidade dos produtos e repoñer nos gabinetes.
Neste proceso de aprendizaxe, destaca a boa acollida por parte do equipo da clínica, así como a súa enteira disposición para que a inclusión plena de Sofía sexa unha realidade. Ser parte activa da sociedade e ter un emprego estable é fundamental para que Sofía alcance os seus obxectivos de vida autónoma. Agora mesmo, a súa motivación é aforrar o seu salario para, nun futuro, vivir nun piso con máis compañeiros/as.
A realización profesional que alcanzou Sofía con este contrato é o premio a un camiño de esforzo e perseveranza. Durante estes anos, formouse tanto no perfil administrativo como no sector da hostalería, completando mesmo diferentes períodos de prácticas formativas como conserxe, axudante de cafetería, limpadora e axudante de oficina en empresas do tecido empresarial vigués.
Desde Down Vigo agradecemos a Sanitas Dental o seu compromiso coa igualdade de oportunidades para as persoas con Síndrome de Down e diversidade intelectual e animamos a Sofía a seguir demostrando que a inclusión non só é posible, senón que é unha realidade.
