Rubén firma un contrato indefinido como persoal de limpeza en Carrefour
- Este novo compromiso reafirma a colaboración que a empresa ten coa entidade dende 2014
DOWN Vigo e a empresa Carrefour consolidan a súa colaboración apostando por contratar de maneira indefinida a Rubén, que leva tres anos traballando como persoal de limpeza no hipermercado que a compañía ten no Centro Comercial Gran Vía de Vigo. É a segunda persoa da entidade que forma parte do persoal da tenda, desde que en 2014 se iniciase a colaboración coa asociación.
As súas funcións, tal e como el explica, son “limpar as oficinas e a tenda”. Antonio Iglesias, Director de Recursos Humanos de Carrefour, destaca de Rubén “a súa rápida adaptación ao posto, o seu compromiso e a súa ilusión. Había unha frase que repetiu varios días: “Toño, cando empezo?”.
A reacción de Rubén ante a firma deste novo contrato é de alegría, pero tamén de orgullo ao ver a súa gran evolución no desenvolvemento do seu traballo e os resultados do seu esforzo: “cada día véxome mellor e máis rápido”. Sobre isto, Antonio Iglesias indica que “a nivel persoal síntome feliz ao ver a evolución tan positiva de Rubén e o logro de superar as dificultades de comunicación, que hoxe me parecen xa moi afastadas”.
Con este novo paso cara á súa autonomía persoal e independencia, Rubén está máis preto de lograr o que era o seu obxectivo fai tres ano: “gustaríame seguir aquí moito tempo e esfórzome porque quero conseguilo”.
A colaboración de Down Vigo e Carrefour Vigo II comezou o seu percorrido no ano 2007. Neste tempo, foron varias as persoas do Servizo de Emprego con Apoio da entidade quen mellorou a súa experiencia laboral na cadea de hipermercados, ben sexa a través de prácticas ou grazas a contratos en distintos postos de traballo, como persoal de caixa ou de reposición. Como afirma Antonio Iglesias, “a incorporación de Rubén ao noso equipo de traballo reafirma o compromiso que temos coa integración de persoas con diferentes capacidades”.
Desde DOWN Vigo agradecemos a Carrefour a súa implicación coa igualdade de oportunidades e damos o parabén a Rubén por superar este reto.
