Participamos no II Encontro Nacional de Profesionais e Representantes
- A entidade contou coa representación de Inma Miguélez, da Rede Nacional de Vida Independente, e Sara Abalde, da Rede Nacional de Emprego con Apoio, xunto ás profesionais de referencia das áreas
- Máis de 160 persoas -representantes, técnicos, xerentes e directores– de asociacións federadas de toda España reuníronse en Madrid para poñer as súas experiencias en común
Esta fin de semana tivo lugar o II Encontro Nacional de Profesionais de DOWN ESPAÑA, ao que tamén asistiu Down Vigo. Inma Miguélez, da Rede Nacional de Vida Independente, e Sara Abalde, da Rede Nacional de Emprego con Apoio, viaxaron ata Madrid acompañadas por María Vara, responsable de Vida Independente; Eva Alonso, responsable de Emprego con Apoio; e Jana Ruiz, técnica de Emprego con Apoio. Os/as diferentes representantes das asociacións compartiron reflexións nun espazo consultivo no que puideron valorar algúns dos proxectos de DOWN ESPAÑA.
En total, máis de 160 persoas -representantes, técnicos, xerentes e directores– de asociacións federadas de toda España reuníronse para compartir experiencias e aprendizaxes das diferentes entidades. Durante dúas xornadas, cada participante puido compartir experiencias e formación sobre todos aqueles temas relevantes para as persoas con Síndrome de Down e diversidade intelectual. Tamén para o equipo de profesionais que traballan en asociacións de DOWN ESPAÑA. Educación, emprego inclusivo, atención temperá, envellecemento ou vida adulta foron algúns dos asuntos tratados polos técnicos nas sesións dun encontro único no sector.
Paralelamente, os directores e xerentes das asociacións participaron nun interesante foro sobre propostas estratéxicas e en diferentes charlas sobre márketing ou a situación do convenio laboral do sector. Para José Gutiérrez, director de Programas de DOWN ESPAÑA, “este Encontro foi un espazo totalmente colaborativo no que directores, profesionais e persoas con síndrome de Down, que actúan en representación do colectivo, traballaron xuntos para que a misión de DOWN ESPAÑA sexa unha misión compartida por todas as entidades que a compoñen».
Este II Encontro de Profesionais de DOWN ESPAÑA celebrouse grazas á colaboración de Ministerio de Dereitos Sociais e Axenda 2030, Fundación Once e NTT Data.
