O Encontro autonómico de familias e profesionais do Movemento Down en Galicia reúne a máis de 250 persoas na cidade de Vigo

• A cita ofreceu ás persoas participantes un lugar de aprendizaxe e intercambio de ideas, experiencias e coñecementos

• Autoridades locais e autonómicas participaron nas diferentes actividades do Encontro

• A xornada combinou no seu programa relatorios divulgativos, actividades para o público infantil, unha visita turística pola cidade e unha gran actividade lúdica grupal

O intercambio de experiencias e o desfrute dunha xornada distendida foron os eixos centrais do Encontro de Familias do Movemento Down Galicia 2024, celebrado hoxe na cidade de Vigo.

Este encontro autonómico, ao que asistiron máis de 250 persoas, tivo por obxectivo principal proporcionar un espazo de encontro no que as persoas participantes puidesen compartir experiencias e coñecementos relacionados coa síndrome de Down e a discapacidade intelectual, así como desfrutar de tempo de ocio con persoas vencelladas ás entidades Down de Galicia.

A xornada deu comezo con diferentes actividades para os distintos grupos de persoas participantes. Así, as e os máis pequenos desfrutaron de multitude de actividades lúdicas, coas que pasaron unha mañá entretida e divertida.

Por outra banda, moitas das persoas usuarias maiores de 15 anos das distintas entidades Down de Galicia, puideron coñecer a historia da cidade olívica en profundidade grazas a unha visita guiada en autobús. O percorrido deu comezo en Samil e continuou pola zona portuaria e Praza América ata chegar a Castrelos, onde fixeron a primeira parada da mañá para coñecer máis sobre Vigo. A seguinte parada foi no Castro, para despois baixar pola Gran Vía de volta a Samil.

Paralelamente, familiares e profesionais vencellados ao Movemento Down de Galicia, así como persoas usuarias que escolleron esta opción, asistiron a algún dos dous relatorios organizados para este Encontro no Museo Verbum. O primeiro deles, titulado “A importancia da autonomía ao longo a vida”, estivo dirixido polo psicólogo e xerontólogo Gonzalo Berzosa, un dos maiores expertos neste tema no noso país. Durante a súa intervención, Berzosa destacou a relación directa entre a vida autónoma, o benestar persoal e a inclusión social para as persoas coa síndrome de Down e outras discapacidades intelectuais.

Por outra banda, Raquel Doval, psicóloga e psicoterapeuta, centrou a súa intervención na “Sexualidade e vida independente”, unha formación moi demandada por moitas das familias que forman parte da Federación Down Galicia. Doval resaltou a importancia de educar en sexualidade, previndo e acompañando no desenvolvemento dunha sexualidade sa e respectada.

Un programa para todos os gustos

Trala xornada matutina, as persoas participantes reuníronse no Hotel Attica 21 Vigo Business&Wellness, onde se levou a cabo a inauguración oficial do Encontro da man de Delmiro Prieto, presidente de Down Galicia, que aproveitou a súa intervención para valorar positivamente este evento e para agradecer a asistencia de todas as persoas presentes. O evento continuou cun xantar de confraternización no que as persoas asistentes puideron compartir ideas e vivencias con outras familias e profesionais participantes no Encontro.

Ao remate desta comida, desfrutaron dunha actividade grupal sorpresa, guiada polo mestre de cerimonias Carlos Veleiro, un polifacético actor e cómico que conseguiu arrancar os sorrisos do público presente.

Así, durante a sobremesa, vivíronse momentos máxicos da man de Lola Menta, un mago vigués que captou toda a atención das persoas asistentes cos seus magníficos trucos durante máis dunha hora.

E a xornada pechou coa actuación musical de Noemí Fernández, artista galega que vén de participar nun recoñecido programa televisivo e que logrou poñer en pé ás máis de 250 persoas alí reunidas coa súa impoñente voz e posta en escena.

No transcurso do Encontro, contouse coa participación do Secretario Territorial da Xunta en Vigo, Fernando González Abeijón, e coa visita da Directora Xeral de Persoas con Discapacidade, Begoña Abeijón Fernández; da Directora Territorial de Política Social e Igualdade de Vigo, Ángeles Rouco Fernández; e da concelleira de Turismo e Xuventude do Concello de Vigo, María Lago, que quixeron compartir tempo coas familias presentes e desfrutar dun momento agradable xunto a elas.

A realización do Encontro Autonómico de Familias do Movemento Down Galicia é posible grazas á achega da Consellería de Política Social e Igualdade da Xunta de Galicia a través das subvencións destinadas á realización de programas de interese xeral para fins de carácter social con cargo á asignación tributaria do 0,7% do Imposto sobre a Renda das Persoas Físicas (IRPF).