Impartimos o curso ‘Reprodución e arquivo’, de Inserta Empleo, para mellorar a empregabilidade de dez alumnos/as

• Esta formación, de 120 horas lectivas, impártese nas instalacións de Down Vigo dende o pasado 23 de setembro

Dez alumnos/as do servizo de Formación da entidade asisten desde o pasado 23 de setembro ao curso ‘Reprodución e arquivo’, convocado por Inserta Empleo como parte do programa estatal FSE+ de emprego xuvenil (CCI: 2021ES05SFPR001) e/o o programa estatal FSE+ de inclusión social, garantía infantil e loita contra a pobreza (CCI: 2021ES05SFPR003).

O proxecto formativo, que consta de 120 horas lectivas, ten como obxectivo principal promocionar a formación e o emprego das persoas con Síndrome de Down e diversidade intelectual para a súa inclusión sociolaboral.

O contido, estruturado en unidades formativas, inclúe o seguinte contido teórico-práctico: contorna de traballo dos principais sistemas operativos; técnicas de arquivo e clasificación de documentación administrativa; reprodución en equipos de reprografía; e operacións de encadernación funcional de documentos. Ao finalizar a acción formativa, o alumnado terá adquiridas as competencias necesarias para gravar datos e textos, asegurando a corrección dos datos, así como extraer distintos tipos de informacións, utilizando para iso diferentes aplicacións informáticas.

Este proxecto súmase así aos proxectos formativos en perfís profesionais específicos da entidade, que favorecen a inclusión das persoas con Síndrome de Down e diversidade intelectual na contorna laboral ordinaria grazas á formación continua e a mellora da empregabilidade de cada participante. Esta formación desenvólvese baixo o cofinanciamento do Fondo Social Europeo no marco que representa a execución e xestión do programa estatal FSE+ de emprego xuvenil (CCI: 2021ES05SFPR001) e/o o programa estatal FSE+ de inclusión social, garantía infantil e loita contra a pobreza (CCI: 2021ES05SFPR003).

Fundación ONCE é Organismo Intermedio para o novo período de programación 2023-2029, e actúa ao mesmo tempo como Beneficiario das Convocatorias dos programas anteriormente referidos, para cuxa execución conta coa Asociación Inserta Empleo.