E a vida converteuse en maxia
- As persoas da entidade representan unha obra teatro-musical con motivo do Día Internacional das Persoas con Discapacidade, que se conmemorou esta semana
- O evento tivo lugar o xoves 05 de decembro ás 20 horas no auditorio do Concello de Vigo
- Asistiron Abel Caballero, Alcalde de Vigo; David Regades, Delegado Especial do Estado no Consorcio da Zona Franca de Vigo; Yolanda Aguiar, concelleira da área de Goberno de Política Social e Turismo do Concello de Vigo; e Inés González, Directora Xeral de Consorcio Zona Franca de Vigo
A vida comeza cun parto. A partir de aí, sucédense os actos: un bebé, a súa nai, algún conflito adolescente, os estudos, ou as primeiras emocións incómodas. Quizá unha voda, ou quizá unha fuxida. Seguro que un traballo e unha xubilación. Finalmente, todo termina coa morte, ou non?
Con todos estes ingredientes, DOWN VIGO puxo este venres as emocións do público a flor de pel. A cita foi no auditorio do Concello de Vigo a partir das 20 horas. Durante aproximadamente unha hora e media, as case 50 persoas de todas as idades que asisten ao servizo de Musicoterapia actuaron para un público disposto a deixarse sorprender. En primeira fila, contaron coa presenza de Abel Caballero, Alcalde de Vigo; David Regades, Delegado Especial do Estado no Consorcio da Zona Franca de Vigo; Yolanda Aguiar, concelleira da área de Goberno de Política Social e Turismo do Concello de Vigo; e Inés González, Directora Xeral de Consorcio Zona Franca de Vigo.
Esta obra celebra a vida, que chega a nós con moitos altibaixos. Luces e sombras. As luces, a parte máis alegre, tenra e fermosa de vivila. As sombras, a parte máis amarga, escura e triste. Transitamos ambas. As persoas con Síndrome de Down e diversidade intelectual, tamén. Aínda que ás veces se lles negue a oportunidade. Eles e elas, desde o escenario, ensinarannos cal é A MAXIA DA VIDA. A resurrección.
Desde hai semanas, a entidade prepara este evento escenográfico no que as emocións son o fío condutor dunha secuencia de escenas protagonizadas por adultos e peques do servizo de Musicoterapia, así como por parte do equipo profesional da entidade. Durante as sesións de aula semanais, as persoas participantes deseñaron tanto o guion como a posta en escena, coordinados por Erick Alexander Corrente, técnico do servizo de Educativa. Así mesmo, contamos coa colaboración desinteresada das asociacións Asotraxe e Arroutada, e de Berto, músico. O resultado é a obra que representaron fronte a familiares, amigos/as e autoridades. GRAZAS.
Musicoterapia, que é?
A Musicoterapia consiste no uso terapéutico da música, así como todos os seus elementos, para mellorar a saúde mental e emocional das persoas. As principais técnicas que se empregan habitualmente nestas sesións son a experimentación, a composición, a recreación e a improvisación utilizando como principal canle sensorial o oído. Adaptando a intervención a cada persoa usuaria, pódense obter melloras a nivel físico, emocional e cognitivo.
A través da Musicoterapia, trabállase a disciplina; o desenvolvemento da linguaxe (foméntase a audición e a dicción); e o corpo (a través do baile). De forma transversal, axuda a estar en equilibrio coa contorna por ser unha forma de conseguir a plenitude como ser humano, por medio das artes.
