Down Vigo participa nas Xornadas sobre Integración laboral de persoas con discapacidade organizadas pola Universidade de Vigo
- Guillermo Fernández, que asiste ao servizo de Emprego con Apoio, participou no relatorio acompañado polo seu preparador laboral David Esperón
- Tamén interviñeron Eva Alonso, responsable do servizo de Emprego con Apoio, e Isabel Sierra, prospectora laboral de Down Vigo
Nazario Correa, Director Xeral de Rodavigo, empresa colaboradora da entidade, ofreceu o perfecto exemplo de que a inclusión laboral das persoas con Síndrome de Down e diversidade intelectual é posible
O pasado 26 de novembro, a Universidade de Vigo celebrou as Xornadas sobre Integración laboral de persoas con discapacidade na Facultade de Ciencias Xurídicas e do Traballo. Nelas participou Guillermo Fernández, que asiste ao servizo de Emprego con Apoio da entidade. Acompañado polo seu preparador laboral David Esperón, Guillermo describiu a súa traxectoria profesional, o seu actual emprego como axudante de caixas en Alcampo e o resto dos seus proxectos académicos e persoais.
No relatorio tamén participaron Eva Alonso, responsable do servizo de Emprego con Apoio, e Isabel Sierra, prospectora laboral de Down Vigo. Ambas explicaron en que consiste o proxecto, as figuras que participan no mesmo, así como a realidade á que se enfrontan cada día para a inclusión de persoas con Síndrome de Down e diversidade intelectual. E o mellor exemplo de que se trata dun obxectivo alcanzable deuno Nazario Correa, Director Xeral de Rodavigo. O seu compromiso e a colaboración coa nosa entidade dá como resultado que actualmente haxa tres persoas do servizo contratadas na empresa. Agradecemos o exemplo e a oportunidade de demostrar que a inclusión sociolaboral en empresas ordinarias non só é posible, senón que xa é unha realidade pola que seguiremos traballando cada día.
Diferentes enfoques: empresarial, institucional, académico…
Estas Xornadas foron organizadas pola aula de Formación Legal da Facultade de Ciencias Xurídicas e do Traballo. A participación de Down Vigo, así como a de Rodavigo, enmárcase no obxectivo de incorporar o punto de vista dos diferentes axentes implicados na inclusión laboral. Entre outros, tamén interveu a directora da área de Emprego e Emprendemento da Universidade de Vigo, Maruxa Álvarez, para explicar o Programa universitario para o emprego e a vida autónoma, iniciativa dirixida a dotar ao alumnado de competencias que melloren a súa autonomía, formación académica e preparación laboral.
