DOWN Vigo conmemora o Día Mundial da Síndrome de Down co III Desfile Inclusivo
- O evento, promovido por Decathlon e no que tamén participa Discamino, será o vindeiro venres 21 de marzo ás 17:00 horas no CC Vialia de Vigo
- Desta maneira, unímonos aos actos conmemorativos do Movemento Down en Galicia, que este ano organiza o seu acto anual na Coruña
- Pola súa banda, a campaña de Down España reivindica máis inclusión co lema #TanComoTú
DOWN Vigo conmemora o Día Mundial da Síndrome de Down, que terá lugar o próximo 21 de marzo, para, un ano máis, visibilizar a inclusión real e romper os estereotipos que aínda permanecen na sociedade.
O venres 21 de marzo ás 17:00 horas celebrarase o III Desfile Inclusivo, en colaboración con Decathlon e Discamino, no escenario Vigo Exporta (planta baixa) do centro comercial Vialia, en Vigo. Trátase dunha iniciativa solidaria que busca sensibilizar acerca dos valores do deporte: cooperación, esforzo e traballo en equipo. Persoas coa Síndrome de Down e outras diversidades compartirán pasarela con traballadores/as de Decathlon, para entre todos mostrar que calquera actividade física pode ser unha ferramenta de desenvolvemento individual e colectivo.
Acto de Down Galicia
O Movemento Down en Galicia organiza o seu acto anual co que busca dar visibilidade ás persoas con Síndrome de Down e facer oír as súas reivindicacións. O evento será no Paraninfo da Rectoría da Universidade da Coruña a partir das 19:30 horas do venres 21 de marzo.
Campaña de Down España
Con motivo do Día Mundial da Síndrome de Down, Down España lanza a campaña “#TanComoTú”, que mostra que as persoas con síndrome de Down senten, pensan e actúan “tan como ti, tan como todos nós” e que pretende sensibilizar sobre a necesidade de construír unha sociedade verdadeiramente inclusiva e desmontar estereotipos.
Agradecemos enormemente a Decathlon e ao CC Vialia de Vigo a súa xenerosidade e mais o seu compromiso coa inclusión nesta data tan significativa para as persoas coa Síndrome de Down.
