DOWN VIGO colabora na elaboración dunha alfombra de flores con motivo das festas do Corpus de Ponteareas
- Con esta iniciativa, axudamos a visibilizar este Ben de Interese Cultural do Patrimonio Inmaterial de Galicia. no centro comercial Vialia de Vigo
- O acto contou coa presenza de autoridades locais como Mª Nava Castro, alcaldesa de Ponteareas; Nidia Arévalo, alcaldesa de Mos; e Miguel Ángel García Correa, presidente da Asociación de Alfombristas do Corpus Christi de Ponteareas
- Trátase dun traballo colaborativo xunto a ADICAM, Avelaíña, Bolboretas Dragon Boat da Coruña e Dar + Ponteareas A Casa da Porteliña
Este venres, a entidade colaborou na elaboración dunha alfombra de flores no centro comercial Vialia de Vigo, con motivo da inauguración das Festas do Corpus Christi en Ponteareas, que se celebran o vindeiro venres 6 de xuño. Así, a arte efémera do Corpus de Ponteareas volverá converterse nun símbolo de unión, inclusión e compromiso social, representado nunha alfombra floral que se poderá visitar durante dúas semanas na planta baixa do centro comercial Vialia de Vigo, e que este ano está dedicada á loita contra o cancro de mama.
A iniciativa, impulsada pola Asociación de Alfombristas do Corpus Christi de Ponteareas, busca achegar ao público unha das tradicións culturais máis recoñecidas de Galicia, utilizando a linguaxe universal das alfombras florais para sensibilizar e dar visibilidade ás diferentes realidades de miles de persoas e familias na provincia de Pontevedra.
Nesta edición, o proxecto adquire ademais un marcado carácter inclusivo e participativo. Xunto a ADICAM, Avelaíña, BolboretasDragonBoat da Coruña e Dar + Ponteareas A Casa dá Porteliña fomos os protagonistas dunha acción que une cultura, integración e solidariedade. A actividade pon en valor o carácter social e comunitario que sempre definiu ao Corpus Christi de Ponteareas, unha celebración con máis de 200 anos de historia, recoñecida internacionalmente polas súas espectaculares alfombras florais e declarada Ben de Interese Cultural do Patrimonio Inmaterial de Galicia pola UNESCO.
Ana, Ángela e Tamara uníronse ao resto de participantes para achegar visibilidade, inclusión e compromiso cos valores da cooperación, a tradición e o patrimonio, parte fundamental da inclusión, a igualdade de oportunidades e a sensibilización social.
O acto contou coa presenza de autoridades locais como Mª Nava Castro, alcaldesa de Ponteareas; Nidia Arévalo, alcaldesa de Mos; e Miguel Ángel García Correa, presidente da Asociación de Alfombristas do Corpus Christi de Ponteareas. Desde DOWN Vigo agradecemos o compromiso activo de organismos públicos e privados coa inclusión e a igualdade de oportunidades e traballamos cada día para visibilizar o papel activo que teñen na sociedade as persoas con Síndrome de Down e diversidade intelectual.
