A Autoridade Portuaria renova o seu compromiso con DOWN Vigo
- O convenio permitirá realizar prácticas formativas na Autoridade Portuaria durante un período inicial de seis meses
- Sara está ilusionada e ten “moitas ganas de aprender as tarefas”
Este luns, DOWN Vigo e Autoridade Portuaria renovaron o seu convenio de colaboración en favor da inclusión laboral de persoas con Síndrome de Down e diversidade intelectual. Un ano máis, a firma deste acordo permite a realización de prácticas formativas no organismo portuario. Así, Sara realizará tarefas administrativas durante seis meses no Departamento de Asuntos Xurídicos, nas oficinas centrais da Autoridade Portuaria, dixitalizando documentación.
Á firma do acordo, que suporá unha oportunidade laboral para Sara, asistiron Carlos Botana, Presidente da Autoridade Portuaria de Vigo; Alberto Fuentes, Xefe de Departamento de Asuntos Xurídicos da Autoridade Portuaria de Vigo, José Manuel García Orois, Presidente de DOWN Vigo; Roberto Campo, Director Xerente de DOWN Vigo; e Isabel Sierra e Sebastián Álvarez, prospectora e preparador laboral da entidade, respectivamente.
Para Sara, esta oportunidade chega despois de completar a súa formación académica con proxectos das especialidades de Comercio e Reprodución e Arquivo, así como formación superior inclusiva da rama administrativa nas instalacións da Universidade de Vigo. As súas primeiras sensacións son moi positivas: “o primeiro día de traballo foi superbien. Os compañeiros son moi simpáticos e teño moitas ganas de aprender as tarefas”. Para ela, esta oportunidade é o inicio do camiño cara a unha vida autónoma e independente: “no futuro, gustaríame ter un traballo de tipo administrativo e vivir coa miña parella”.
Dende DOWN Vigo agradecemos á Autoridade Portuaria o seu compromiso coa inclusión das persoas con Síndrome de Down e diversidade intelectual, o cal queda demostrado de novo con outra oportunidade de inclusión laboral ao longo dos anos. Animamos a Sara a continuar co seu esforzo para alcanzar as súas metas laborais e persoais.
